EL CLUB DEL ALGODÓN LOS XUEVES A LES 22:00 H

El Club del Algodón ye una aventura radiofónica qu'entamó hai yá ocho años en Radio Sele (106.5 FM). Por cuenta un maratón de radio n'asturianu (24 hores ininterrumpíes emitiendo nel nuestru idioma) entamáu por esta emisora, Mária Montes y yo mesmu animémosmos a facer un programa pa collaborar cola aniciativa. Aquel primer programa emitióse dafechamente grabáu, porque'l miéu al direutu yera escesivu como pa llanzamos a emitir "ensin rede". Ehí empecipió too. La radio entrómos peles venes y hasta güei. Demientres 4 ó 5 años, El Club del Algodón yera una xera repartida a partes iguales ente Mária Montes y Xulio Vixil Castañón

Dende'l mio puntu vista, fueron los meyores años, porque la compañía yera la perfeuta pa facer un programa de radio o pa cualesquier otru menester. Pero, coses de la vida, d'aquella direición bicéfala pasamos a la realidá d'anguaño, con una cabeza y delles estremidaes. El Club del Algodón, fiel a los sos oríxenes, sigue una llinia asemeyada a la que marcó'l so empiezu. Propunxímonos la xera de facer un programa n'asturianu con una puesta n'escena radiofónica qu'encaxa nel más clásicu tuguriu de jazz al usu: munchu fumu, munchu jazz (o blues, o reagge, o Silvio, o rock) y una copa xelada de D. Periñón de Villaviciosa. Pero, yá de mano, pensamos que nun queríemos un Cotton Club como l'orixinal, porque l'orixinal nun mos prestaba.

Asina, llegamos a la conclusión de que'l nuestru Club debía de tener toles carauterístiques del chigre de Harlem, pero dándo-y un poco la vuelta: equí nun díbemos dexar entrar a los blancos. Asina surdió El Club del Algodón, "pa tolos negros y negres de corazón". El primer eslogan. Y, según diba pasando'l tiempu, díbamos dándomos cuenta de que tábemos muncho a gustu col nuevu color de corazón. Poro, dempués d'ocho años, siguimos abriendo tolos martes, a eso de les diez de la nueche, mirando'l mundu dende la mesa nu 7, la meyor de tol llocal. D'entós p'acá, primero cola presencia de Mária y, agora, sollevando l'ausencia, intentamos siguir faciendo'l Club que nos presta, un sitiu "onde vienen a guardase tolos esclavos qu'escapen". Somos una especia de clan, onde la diosa Eleanor (Billie Holliday) ya la maestra de ceremonies y onde, por fin, atopamos una ventana abierta al mundu pa poder falar de les miseries sangrantes y de los milagros cotidianos.

Asina, tolos xueves, siempre que'l gripe lo permita, cola imprescindible gabita de los compañeros de control, abrimos les puertes d'un chigre insumisu, negru y solidariu, pa enllenamos de blues y de revolución, mentanto falamos de lo que nos paez más interesante, que non más importante. Eso sí, nunca nun zarramos les puertes ensin dar el repasín selmanal a lo que foi del mundu (mundial) na única estaya fixa, de momentu, que llamamos Les anuncies piquiñines: nós dámoste'l datu y tu encárgueste de reciclalu. Si t'apetez, hacia les diez d'esti mesmu marte, pasa per equí a conocer a Xin, el camareru, a Aureliano, el veceru, y toma una copa con nós o cualesquier otra sustancia prohibida. Porque lo único illegal n'El Club del Algodón ye l'imperialismu. Eso sí, nun t'escaezas que besos y abrazos nun faen rapazos, pero toquen a víspores. Xulio Vixil Castañón.